3 iyun tarixində Ümummilli lider Heydər Əliyevin 100 illiyinə həsr olunmuş elektrik avtomobillərinin yürüşü uğurla baş tutdu. Azərbaycan avtomobil dilerləri assosiasiyasının (AADA) təşkilatçılığı ilə ən yeni elektromobillərdən ibarət «karvan» Heydər Əliyev Mərkəzindən Qobustan dövlət tarixi-bədii qoruğu marşrutu ilə hərəkət edərək, paytaxt sakinlərinin və çoxsaylı turistlərin marağına səbəb oldu.

«Ulu Öndər Heydər Əliyevin 100 illiyinin Azərbaycan ərazisində mövcud olan ən qədim insan məskənində qeyd edilməsi və eyni tədbirdə gələcəyi təsvir edən istedadlı uşaqların təltif olunması zənnimcə son dərəcə simvolik məna daşıyır.» - N.Zərbəliyev qeyd etdi.

Məlumdur ki, Azərbaycan Respublikası Prezidentinin Sərəncamı ilə təsdiq edilmiş «Azərbaycan 2030: sosial-iqtisadi inkişafa dair Milli Prioritetlər» proqramında təmiz ətraf mühitə nail olmaq və “yaşıl artım” ölkəsinə çevrilmək kimi hədəflər təyin edilmişdir.

Təsadüfi deyil ki, yürüşün final mərhələsində məktəblilər arasında elan olunmuş «Gələcəyin ekoloji avtomobili» mövzusunda «onlayn» rəsm müsabiqəsinin qaliblərinin elan olunması nəzərdə tutulmuşdu.

Daha sonra ekologiya naziri gələcəyin ekoloji avtomobillərini yaratmış gənc rəssamların diplom və mükafatlarını təqdim etdi. Rəsmi hissədən sonra qonaqlar üçün çay süfrəsi və Qobustan qoruğuna ekskursiya təşkil olundu.

Tədbiri yekunlaşdırarkən AADA sədri bu layihənin gerçəkləşməsində dəstək göstərmiş Ekologiya və Təbii Sərvətlər Nazirliyinə, Mədəniyyət Nazirliyinə, Azərbaycan Avtomobil Federasiyasına və eləcə də AADA-nın daimi tərəfdaşları «Mashin.Al» «onlayn» avtomobil mərkəzi və elektromobillər üçün «şarj» avadanlığı idxal edən «MLK Tech Group»a təşəkkür etdi.

Ümummilli Lider Heydər Əliyevin 100 illiyinə həsr olunmuş elektrik avtomobillərin yürüşü keçirilir