Nazirlər
Kabinetinin qərarı ilə istehsal ili 10 ildən artıq olan avtomobillərin ölkəyə
idxalına qadağa qoyulması sürücülərin yanacaqla bağlı bir sıra addımlar
atmasına səbəb olub. Belə ki, yeni avtomobillər daha çox “Aİ-95” və “Aİ-98”
markalı benzinlərin istifadəsini tələb edir. Bu isə aşağı büdcəli vətəndaşlar
üçün uyğun deyil. Bəzən çıxış yolu kimi isə yanacaq çəninin&nbsp;80-90&nbsp;%-i
“Aİ-92”, qalan&nbsp;10-20&nbsp;%-i isə “Aİ-95” yaxud “Aİ-98” markalı benzinlərin
qarışığının tökülməsi təklif edilir.

Avtomobil məsələləri üzrə ekspert&nbsp;Eldəniz
Cəfərov&nbsp;bildirib ki, belə qarışıqlardan istifadə nəqliyyat vasitəsinə çox
ziyan vurur:

“Artıq son zamanlar “Aİ-92” və “Aİ-95” yaxud “Aİ-92”
və “Aİ-98” markalı benzinlərin qarışdırılmasının necə ola biləcəyi ilə bağlı
müzakirələr artıb. Onu deyim ki, belə qatışıqları yanacaq çəninə tökmək olar,
amma bu avtomobilə mənfi təsir edəcək. Artıq avtomobil istehsalçıları və rəsmi
diler mərkəzləri də qətiyyətlə bunu etməyi məsləhət görmürlər. Əgər “Aİ-95”
markalı benzinlə işləyən avtomobilə daha zəif benzin tökülsə sürücü bilməlidir
ki, o gec-tez nasazlıqla üzləşəcək.”

Ekspert sürücülərə benzinləri qarışdırmaqdansa əlavə
normallaşdırıcı qatqılardan istifadəni tövsiyə edir:

“Müasir yağlar xüsusən də Yaponiya istehsalı
avtomobillər üçün olan “ilsac”, Asiya istehsalı avtomobillər üçün “A5,B5”,
BMW-nin “Longlife”, “Mercedes-Benz”in “229.71” tipli yağları kükürdü az olan
keyfiyyətli və müasir yanacaq tələb edir. Qısa deyim ki, keyfiyyətsiz yanacaq
yağın belə keyfiyyətini öldürür.

Sürücülər üçün ən yaxşı qənaətcil variant benzinləri
bir-birlərinə qarışdırmaq deyil, onları neytrallaşdırmaqdır. Məsələn, “Aİ-92”
markalı benzini stabilizator tipli qatqılarla neytrallaşdırmaq olar. Məhz
onların qablarının üzərində yazılır ki, bu benzini neytrallaşdırır, kükürdü
azaldır, yanmanı tamlaşdırır. Amma beniznləri qatışdıranda isə heç nə almaq mümkün
olmur”.

Ekspert sürücülərə əlavə normallaşdırıcı qatqılardan istifadəni tövsiyə edir