Elektrikli avtomobillərə investisiyalarını davam etdirən Alman avtomobil istehsalçısı Volkswagen, ilk elektrik modeli ID.4-ü, daha sonra isə, ID.4-ün "kupeyə bənzər" versiyası kimi təsvir edilə bilən yeni ID.5 modelini təqdim edib.

Yeni elektrik Volkswagen ID.4 və ID.5 modelləri yeni proqram təminatı və mühərriklərlə Avropada satışa çıxarılıb.

Elektrikli Volkswagen ID.4 və ID.5 modellərindəki ən böyük yeniləmələrdən biri yeni nəsil məlumat-əyləncə sistemi və proqram təminatıdır. Bundan əlavə, indi bu modellərdə standart olaraq daha böyük 12,9 düymlük multimedia ekranı təklif edilir.

ID.4 və ID.5 modellərində ötürücü seçici əvvəllər rəqəmsal ekranın kənarına bərkidilmişdisə, ID.7-də olduğu kimi, 2024-cü model ilində də sükan sütununa köçürülüb.

Güc ötürücü sistemində 77 kVt/saat tutumlu akkumulyatora malik arxa ötürücülü ID.4 Pro və ID.5 Pro modelləri yeni elektrik mühərriki ilə təchiz edilib.

İlk dəfə ID.7-də gördüyümüz bu mühərrik 282 at qüvvəsi və 545 Nm fırlanma anı hasil edir. Bu, hazırkı modellərlə müqayisədə 81 at gücündə əhəmiyyətli güc artımı deməkdir.

Ailənin zirvəsində olan ID.4 GTX və ID.5 GTX modellərində 40 at gücündə güc artımı, ümumilikdə 335 at gücünə çatdığını görürük. Nəticədə, modellərin 0-100 km/saat sürətlənmə müddəti 5,4 saniyəyə qədər azalır, maksimal sürət isə 180 km/saatla məhdudlaşdırılır.

2024 Volkswagen ID.4 və ID.5 modelləri Avropada satışa çıxarılıb